銅鑼灣 Cafe:食好野過好日子 — 鬧市巷仔嘆純牛手打漢堡

銅鑼灣食肆雖然多,但有時想搵間有氣氛嘅餐廳靜靜地食下飯吹下水都唔係咁容易。想舒舒服服 hea 住食,小編多數會揀銅記外圍嘅希雲街。呢條短短嘅巷仔入面有十幾間獨立小店,cafe、日式甜品舖、居酒屋、西餐廳、獨立設計師品牌……間間都好有個性,非常好 feel~而今日同大家黎嘅,就係小編 To Eat List 入面其中一間必試餐廳 — Good Day Cafe!

Good Day Cafe 喺正希雲街入口,店入面大概有廿個位咁上下,舖仔細細一眼望哂。小編閒日 lunch time 黎幫襯,咁啱就撞到正成學生放飯,都等咗一段時間先有位。建議大家有時間嘅,最好都係等兩點後黎嘆番個 tea~

IMG_3378_edit.jpg

店面裝修行日系簡約原木風格,並唔闊落,靠牆邊坐可以話係有啲逼。兩邊牆上都放咗唔同裝飾,有啲幾鬼馬嘅港式句子,都算幾有心思。如果坐正窗邊位,陽光斜斜地咁曬落黎,感覺都幾悠閒寫意~呢種光線仲好啱影日系文青相!

Good Day Cafe 主打西餐同自創菜式,有 set lunch 同 set dinner 供應,以銅鑼灣 cafe 黎講,呢個價位嘅 set 算係抵食!係學生嘅話仲有學生餐添,都係四十零五十蚊咋!呢度大時大節仲會有節日限定套餐,唔想慶節都要幫襯大集團嘅朋友到時到候可以留意下~

小編今次就散叫咗佢地幾款皇牌打卡食物:流心芝士炸魚薯條、All Day Breakfast、烤珍寶蘑菇手打牛肉芝士漢堡、56% 特濃朱古力、玉桂蘋果雪梨茶、是日甜品~食物整體黎講都幾有心思同創新,有嘗試喺一啲 cafe 常見菜式入面玩下花款。

好日特制流心芝士炸魚薯條($103)🌟🌟🌟🌟

堅抵食嘅 fish & chips!平時呢個價係出面多數都係得一塊魚,呢度竟然多舊魚!仲要舊舊都有一隻手掌咁長!薯條係即炸,非常香脆,亦好重薯味,熱辣辣食超正~

嘩嘩嘩!切開之後啲芝士真係會叭叭聲咁流出黎,真爆漿真流心!至於食落口感就同一般炸魚差唔多,炸皮唔算太厚,唔會好油,魚肉亦夠嫰滑;芝士偏輕身偏淡,一齊食都唔會搶哂魚味,呢個組合有驚喜!識食嘅朋友一定要用薯條點埋流出黎嘅芝士一齊食!唔可以嘥!

好日豐盛英式早餐($102)🌟🌟🌟

小編呢啲朝早趕頭趕命一定食唔切早餐嘅人,見親 All Day Breakfast 都一定會即嗌。今次重點想試下呢塊青 bb 嘅波菜多士,但好老實,佢就係一塊普通多士,冇咩特別味道;薯餅即炸夠熱夠脆,唔會食到個嘴油淋淋,炒蛋滑溜有蛋香,小編鍾意撈埋蘑菇一齊食,口感會更加豐富;至於沙律就可以解一解煙肉腸仔嘅油膩,不過個黑醋汁對小編黎講就略嫌太甜。

至尊烤珍寶蘑菇手打牛肉芝士漢堡($123) 🌟🌟🌟🌟🌟

跟住出場嘅就係呢個層層疊咁嘅漢堡包!足足有成隻手掌咁高!對比隔離嘅沙律就知道有幾大份~漢堡中間夾住珍寶蘑菇同手打純牛肉扒,仲有好似瀑布咁滿到層層滴落嘅嘅芝士~牛肉扒嘅肉味唔算好重,但勝在多肉汁,唔會煎到乾爭爭,驚喜位反而去咗蘑菇度,蘑菇係非!常!香!同牛肉嘅味道亦都好襯,成個包嘅材料同份量都恰到好處,不過食起黎都真係幾麻煩下,好易會散哂同整到成手污糟邋遢。

ICAM 56%特濃朱古力($46)🌟🌟🌟🌟

小編平時出街都好少叫朱古力飲,因為通常都會甜到糖尿,但既然今次特別注明係 56% 朱古力,就俾個機會佢啦~飲落的確唔會太甜太漏,有香濃朱古力味而且帶小小苦,撈埋少少 cream 落去飲會令口感更加順滑,加埋棉花糖、蛋卷威化餅,成杯野喺好吸引眼球同鏡頭!啱哂小編呢啲死港女打卡~

甜潤蘋果雪梨茶配玉桂條 ($ 48)🌟🌟🌟

大家見唔見到,係心形!心形玉桂條!至於味道呢,小編覺得玉桂味較濃,蘋果雪梨味淡,整體係會偏甜,但暖暖地飲落幾順喉幾滋潤,幾啱女仔秋冬暖身飲。

蘋果金寶撻 $40 🌟🌟🌟

是日甜品 — 蘋果金寶撻,賣相唔錯,甜度都啱啱好,蘋果唔算好多,但焗過之後更加香甜,食落有肉桂香味,但唔鍾意肉桂嘅朋友可能會覺得味道比較重,伴碟嘅無花果都幾新鮮,份量適合兩個人開心 share。

整體評分

味道 🌟🌟🌟🌟

環境 🌟🌟🌟

服務 🌟🌟🌟

價錢 🌟🌟🌟🌟

好日咖啡店 GoodDay Cafe

地址:銅鑼灣希雲街12號地舖

網址:https://app.whoot.com/#/shop?shopId=3

Whoot Limited