識飲識食:愛玉、仙草、涼粉、珍珠其實係...?

最近台式飲品賣到成行成市,非常受港人歡迎。雖然有愈嚟愈多新款嘅飲品推出,就好似最近嘅黑糖珍珠鮮奶咁,但始終都係離不開呢位主角 — 珍珠。相信身為台飲愛好者嘅你年中飲過唔少珍珠,閱珠無數,但係你又知唔知珍珠其實係咩嚟?仲有平時經常見到嘅台飲配料例如愛玉、仙草、涼粉等等,佢地又係由咩製作而成?仙草同涼粉係唔係同一樣野?想知嘅就繼續睇落去啦!

1. 愛玉

平時大家見到嘅愛玉無論外型定口感,都同啫喱似到十足十,但其實愛玉係一種生得非常似芒果嘅植物。將愛玉切半反轉曬乾,再將果乾放入水中搓就會洗出果膠,靜止一段時間後就會開始結成啫喱,我地平時食到極似啫喱嘅愛玉就係咁黎架啦!愛玉唔單止好味,亦都非常健康有益,有降火消暑嘅功效。

2. 仙草

仙草係福建閩南地區同台灣地區嘅傳統特色小吃。同涼粉一樣,其實兩者都係用仙人草製成,只係煮法同口感有啲唔同。台灣多數以太白粉同砂糖製作,混合仙草凝固後就會變得軟滑,非常適合同各種配料或糖水食用。雖然仙草有清熱利濕嘅功效,但係製作過程中加入咗唔少糖份,所以都係唔好食太多啦喇!

3. 涼粉

 

頭先講到仙草同涼粉嘅原料一樣,功效自然相同,只係兩者做法有啲出入。中國個邊多數會加鹼水、粘米粉同粟粉,製作成爽口挺身嘅涼粉。原味嘅涼粉帶啲涼茶味,入口微甘,同糖水簡直就係絕配!

4. 珍珠

珍珠喺台灣有另一個叫法,就係粉圓!名符其實,珍珠其實由係一團粉整成,將木薯粉、黑糖同水混合,搓成團再切粒搓圓。珍珠煙煙韌韌嘅口感其實係來自木薯粉,有好多煙韌嘅食物(例如:芋圓、水晶湯圓、麻糬麵包)都係用木薯粉整成㗎。

Whoot Limited