灣仔.中菜:明星中菜廳 親民價歎茶食點心

香港地話就話周街都搵得到中菜,但其實小炒要炒得惹味又夠鑊氣,點心要整到皮薄餡靚,你估真係咁易咩?絕對係睇師傅嘅經驗功架同心機,所以中菜有時唔一定要食得貴,反而簡簡單單嘅住家菜.最傳統最常食嘅點心先見到真章。

IMG_0135.jpg

今次 lunch time 同成班同事去咗車氏粵菜軒飲茶。呢度晏晝做點心,晚市就主打粵菜住家菜,同埋季節性嘅菜式,有啲仲係懷舊野黎。價錢方面就有平有貴,睇你揀咩菜式啦,不過基本上都唔係離地價。本身以為明星效應啲野食應該一般般啦,但食完可以話你知係比想像中好食,實力同心機都有,而唔係淨係得個名。

車氏喺灣仔酒吧街一幢商廈入面,位置唔算起眼同方便,不過呢種格局反而有種食上樓私房菜嘅感覺。裝修比較簡單,深木色搭黃光望落都幾典雅。大堂本身空間唔大,唔知係咪午市嘅關係,多數都係 10 人大檯,冇乜細檯,檯同檯都排得幾密下,坐落係覺得有啲逼夾嘅。

點心大概有三十幾款,另外仲有廚點同粉麵~點心整體黎講質素唔錯,特別係炸物,起碼樣樣都做到外脆內軟,又唔會太過油膩,蒸點都叫做有水準,唔錯唔錯~


酥皮叉燒餐包 $32 (中) 🌟🌟🌟🌟

雖然佢叫做餐包,但實情佢係墨西哥包黎,外皮甜甜地,酥得黎唔會太乾,食落夠香夠鬆化。包入面係蜜汁叉燒餡,叉燒半肥瘦幾適中,重點係呢個叉燒醬汁,有好多酒樓都會較得偏鹹或者偏甜,而呢度個醬汁鹹甜度啱啱好。一定要趁熱食,好食!

IMG_3575.jpg

蜂巢炸芋角 $32 (中) 🌟🌟🌟🌟

而家唔係間間酒樓都搵得到炸芋角,搵到又未必炸得好。呢個芋角嘅外層鬆化得黎脆卜卜,一咬落去層蜂巢已經碎到成檯都係~入面嘅芋蓉餡口感好綿,芋香都算幾重,仲有雞粒同蝦米,食起黎令到芋蓉嘅味道冇咁單調,帶啲鹹香!


車氏筍尖鮮蝦餃 $38 (優) 🌟🌟🌟

蝦餃應該係酒樓入面最見到真章嘅點心黎,呢個蝦餃嘅皮就唔算係好薄,望落未夠通透,不過上檯時個粘度啱啱好,唔會濕到痴筷子,食落去厚薄同煙韌度都唔錯,餡入面嘅筍尖就唔多嘅,但蝦夠鮮都補返數啦~


潮州粉果 $32 (中) 🌟🌟🌟

比起蝦餃皮,呢個粉果皮就做得幾好,一眼望到入面包住嘅餡,脹卜卜好足料!粉果皮唔會好油,唔會太韌,但又唔係好易穿底個種~內餡嘅調味就不過不失啦,肥豬肉唔會太多,一次過啪哂成粒都唔會覺得好肥膩!


乾蒸燒賣 $35 (大) 🌟🌟🌟🌟

叫得蝦餃又點少得燒賣呢~點心上檯個陣就唔係咁靚,不過食落都幾好食嘅,大大粒,肉質彈牙,蝦同豬嘅比例都幾平均,唔會太肥,係個皮有啲啲乾。

IMG_3595.jpg

山竹牛肉球 $32 (中) 🌟🌟🌟

最鍾意佢呢度塊腐竹,係完整一塊而唔係用啲碎濕濕嘅墊底!牛肉球肉質幾鬆軟,啖啖肉,小編鍾意食芫茜,所以覺得呢度落得唔係幾夠,如果加多少少會更加香!


冰鎮麻香秋葵 $68 🌟🌟🌟

呢個秋葵真係唔講得笑,完全估佢唔到~秋葵本身煮得啱啱好,第一啖咬落去係爽脆,然後就慢慢湧出一陣強勁嘅芥末味!麻醬溝咗芥末,仲要都落得幾重手下,所以係會越食越真辣同攻鼻。


黃金四季豆 $68 🌟🌟🌟

鹹蛋黃味淡咗啲,但勝在炒得勻循,條條都有金沙,仲好乾身,清清地都唔錯。


志偉咕嚕肉 $188 🌟🌟🌟🌟

呢個一定要重點介紹下,因為喺咁多樣野入面令人最驚喜嘅就係佢!呢個咕嚕肉用咗黑毛豬黎整,所以肉質係非常鬆軟,唔會乾、唔會韌、唔會鞋,最緊要係個炸皮唔會太厚,糖醋汁酸甜度都啱啱好,係會令人一舊接一舊咁食,好食!


整體評分

味道 🌟🌟🌟🌟

環境 🌟🌟

服務 🌟🌟🌟

價錢 🌟🌟🌟🌟


車氏粵菜軒 Che's Cantonese Restaurant

地址:灣仔駱克道54-62號博匯大廈4樓

網址:https://app.whoot.com/#/shop?shopId=2

Whoot Limited