8 月 15 食咩好?即睇 4 樣亞洲各地中秋慶節美食

當見到各大餅店開始賣行廣告,Facebook 開始出現「邪惡」、「流心」呢啲字眼,新聞又開始報導餅券炒風嘅時候,就代表 2018 已經過咗大半,即將又嚟到中秋節喇!作為食家,每一個傳統節日都係不停食食食嘅好時機。但除咗月餅之外,你又知唔知中秋仲有咩好食?各位 foodie 不妨參考下其他國家嘅中秋食物,睇下有冇邊種啱你心水!

 
 

中國、泰國、越南、新加坡:月餅

月餅唔止係香港最有代表性嘅中秋美食,亦都係大部分會慶祝中秋節嘅國家,如中國、泰國、越南、新加坡、馬來西亞、柬埔寨等地嘅傳統慶節美食。雖然都係月餅,但就各有各特色。單係中式月餅,已經可以分為廣式、潮式、京式、蘇式四大主要派系,內餡有蓮蓉、蛋黃、豆沙、伍仁、火腿、蔥椒、冬蓉、海味…真係數都數唔哂,仲未計近年大熱嘅新口味,好似奶黃流心、伯爵茶麻糬、芝士蛋糕、紫米龜苓膏白豆蓉呢類創意月餅,難怪大家食極都唔厭啦!

而泰國、越南、新加坡、馬來西亞、柬埔寨同樣都以月餅作為主要嘅慶節美食,做法同餡料都近似於中式月餅,分別就在於新加坡同泰國會較為流行有當地特色嘅月餅,例如榴槤月餅、山竹月餅、膠原蛋白月餅;越南嘅月餅就分為焗月餅同糯米月餅,前者同我地食開嘅差唔多,後者就係以糯米粉,糖漿、柚子花水或雲呢嗱製成。

mooncake_1.jpg

泰國:壽桃、柚子

泰國嘅中秋節又叫做「祈月節」,係八月十五當日,泰國人會用月餅、壽桃、生果嚟拜神同慶節,而當中象徵「團圓」嘅柚子更加係當地人必食嘅中秋水果!

longevity-peach.jpg

日本:月見糰子

日本嘅中秋節又稱為「十五夜」、「仲月」、「芋名月」。中秋當日,日本人會係以月見糰子、酒、栗子、芋頭、枝豆祭神,而當中嘅月見糰子就等如我地嘅月餅一樣,家家戶戶必備。糰子係一種以半濕糯米粉搓製而成嘅食物,多數都係白色圓碌碌好似個波咁,但亦都有橢圓、玉兔等嘅造型。糰子本身冇味,食用時可以配上紅豆蓉、黑蜜、黃豆粉或淋上醬汁,食落煙韌之餘又香甜。


韓國:松片

韓國嘅中秋節又稱「秋夕」、「仲秋節」,係當地嘅重大節日。係韓國,家家戶戶都會襯呢一日聚埋一齊分享食物,當中最有代表性嘅慶節食物必定係松片。松片以白米磨成嘅粉搓製而成,外形呈半月,口感似年糕,入面多數會包花生、紅豆、綠豆、芝麻、栗子等等嘅甜餡料。由於松糕係放喺松葉上蒸,所以食嘅時候會散發一種淡淡嘅香味。除此之外,韓國人仲會係中秋食煎餅同炸物,例如辣椒煎餅、明太魚煎餅、南瓜煎餅等等。

songpyeon.jpg
Whoot Limited