天氣熱食咩都冇胃口?炎夏必備消暑菜式

 
 

暑假話咁快就已經去到尾聲喇,不過香港似乎都仲未有轉季嘅跡象。呢排天氣時濕時熱,就算幾為食嘅人都好易覺得飽飽滯滯,冇哂胃口。大家想搵返食慾,不妨學睇下以下幾道夏日必備嘅醒胃菜式,咁就多多美食都食得落啦!

1. 泰式脆脆雞肉沙律

沙律除咗係女士嘅減肥恩物之外,仲係夏日必備嘅冷盤之一!清新爽口嘅蔬菜加上各式各樣嘅配料同醬汁,絕對可以一解夏天嘅濕悶。以下呢個泰式沙律,簡直集齊哂開胃、美觀、健康、同低卡呢四大重點,做法亦非常簡單快捷,當中嘅蔬菜同肉類仲可以自己 mix and match 添!

 
 

泰式脆脆雞肉沙律(二人份量)

所需材料:

  • 2 杯熟雞胸肉或雞脾肉(亦可以 1 杯大蝦代替)

  • 1 條青瓜

  • 2 條紅蘿蔔

  • 半個紅椒

  • 半個黃椒

  • 30 克芫荽 (約 1 手掌份量)

  • 白芝麻適量

泰式醬汁:

  • ½ 個青檸

  • 3 湯匙麻油

  • 3 湯匙醬油

  • 1 湯匙魚露

  • 適量辣椒片

  • 適量蒜頭

做法:

  1. 將青瓜、紅蘿蔔、紅椒、黃椒切絲。

  2. 加入已煮熟雞肉(或大蝦)同已切碎芫荽。

  3. 切碎蒜頭,並將蒜粒同其他醬汁材料混合。

  4. 將完成嘅泰式醬汁灑上菜上。

  5. 最後將白芝麻灑喺沙律上面。

2. 韓式豆漿冷麵(一人份量)

每個朋友堆入面總有一兩個人係要有澱粉落肚先至安樂。如果驚沙律唔夠飽嘅,冷麵絕對係一個好選擇!平時食日式冷烏冬就食得多喇,今次不如試下整韓國大熱嘅豆漿冷麵!飽肚之餘仲相當有營養,豆漿湯底有豐富蛋白質又低卡,就算連湯飲都冇有怕!

 
soy-milk-noodle.jpg
 

韓式豆漿冷麵(一人份量)

所需材料:

  • 1 條青瓜

  • 1 個韓國蕎麥麵

  • 適量白芝麻

  • 半隻雞蛋

豆漿湯底:

  • 500 毫升韓國無糖豆漿

  • 1 杯冰

  • 適量鹽

做法:

  1. 將韓國無糖豆漿加熱,加入適量鹽調味,放入雪櫃備用。

  2. 將蕎麥麵煮至軟身,撈起放入冰水,雞蛋煮熟。

  3. 青瓜切絲,熟蛋一分為二。

  4. 喺調好味嘅豆漿入面加少量冰,然後放入蕎麥麵、青瓜絲同半隻蛋。

  5. 灑上白芝麻就完成喇。

Whoot Limited