中日韓中秋美食 D.I.Y.:教你整港式冰皮月餅、韓國秋夕松片、日本月見糰子

 
 

就到中秋節喇,香港人做節最唔少得嘅一定就係月餅。奶黃月榴槤月雖然都仲係呢幾年嘅大熱之選,但價錢普遍都越嚟越貴,size 就出得越嚟越細。想慳錢又想搞搞新意思,一於試下落手落腳自己整!除咗我地食開嘅中式月餅之外,今次教埋你 D.I.Y. 日韓大熱中秋美食 —— 月見糰子同松片。無論係自己食定送禮,都夠哂新鮮又有睇頭!

港式冰皮月餅:Earl Grey 奶黃 - 茶香餡滑(約 12 個 50 克月餅份量)

冰皮所需材料:

  • 200 克冰皮月餅粉

  • 100 毫升伯爵茶

  • 20 克菜油

Earl Grey 奶黃餡所需材料:

  • 25 克吉士粉

  • 20 克粟粉  

  • 20 克低筋麵粉

  • 2 隻雞蛋

  • 30 克牛油

  • 2 湯匙伯爵茶葉

  • 2 湯匙煉奶

  • 140 毫升熱水

做法:

  1. 將熱伯爵茶加入冰皮月餅粉,以攪拌器打勻,直至粉團光滑有彈性;加入菜油,慢慢攪拌混合,完成後將粉團雪凍,伯爵茶葉留起備用。

  2. 將煉奶同熱水混合攪勻。

  3. 粟粉、麵粉、吉士粉過篩混合,然後加入蛋汁、煉奶混合物、牛油、伯爵茶葉攪勻。

  4. 將混合好嘅奶黃漿過篩,然後細火加熱,不斷攪拌直至奶黃變得濃稠,攤凍備用。

  5. 將雪凍咗嘅冰皮粉團同奶黃餡料分成 12 份,兩者份量比例為一比一。

  6. 冰皮粉團壓扁成圓片狀,奶黃餡料搓成圓球狀;將餡料放於冰皮中央,包成圓形。

  7. 放入模具,壓成月餅狀。

韓國秋夕松片:半月形米糕送禮最得體(約 12 件)

所需材料:

  • 150 克糯米粉

  • 凍滾水適量

  • 2 克紫薯粉、2 克抹茶粉、2 克南瓜粉 (蔬果粉可按個人喜好隨意配搭)

  • 1 湯匙蜂蜜

  • 半杯白芝麻

  • 適量麻油

做法:

  1. 糯米粉分成 4 份,其中 3 份分別加入紫薯粉、抹茶粉、南瓜粉,1 份維持原色 。

  2. 加入凍滾水,搓成粉團後備用。

  3. 炒香白芝麻,壓碎,加入蜂蜜撈勻。

  4. 將三色麵團各分成 4 小份,餡料分成 12 份。麵團捏成小碗狀,加入餡料,收口後捏成半月形。

  5. 將松片蒸約 12分鐘。

  6. 蒸熟後放涼,然後搽上少量麻油。

日本月見糰子:兔仔造型(約 10 件)

所需材料:

  • 150 克上新粉 (日式超市有售)

  • 50 克白糖

  • 100 毫升熱水

  • 半碗紅豆蓉

做法:

  1. 將上新粉同白糖混合,然後加入熱水,慢慢攪拌並搓成麵團。

  2. 將麵團分做十等份,搓成飽滿嘅橢圓形,再喺橢圓三分一位置按壓,做出兔仔嘅頭部,然後輕輕喺頭頂拉出兩個三角形,捏成兔耳。(唔想咁複雜嘅,亦都可以將麵團分成適當嘅 size,分別搓成頭部、身體同耳仔,再黏合成白兔)

  3. 以中大火蒸約 15 分鐘,完成後放涼,然後用牙簽沾少少紅豆蓉,點成兔仔眼。剩低嘅紅豆蓉可以同糰子一齊食。

Whoot Limited