銅鑼灣.越南河:香港都有得食 北美式越南河有咩特別?

每個人喺唔同時候都有屬於自己嘅 comfort food,對小編黎講,越南河就絕對係其中一種!無論係食滯咗冇胃口,天氣凍冰冰定係前一晚飲醉 hangover,呢啲時候只要整返碗熱辣辣嘅越南河,一定當堂舒服哂!

今次黎嘅呢間越南河 Fûhn 特別講到明係主打北美風味,皆因 Pho 係美國當地係開到成行成市,甚至慢慢發展出自己嘅一套做法同特色,據聞喺外國回流嘅老闆就係因為太掛住呢種味道,甚至掛到要開間舖黎頂癮,老老實實,小編土生土長香港人就未食過外國嘅越南河嘅,今次就一於試試同平時個啲有咩分別先!

Fûhn 淨係個名都已經夠哂特別,望到都 r 哂頭唔知點讀好,入座之後望一望張餐檯紙,It’s “fuh”, not “pho”! 原來個名係玩食字,fun 粉,都幾有心思幾得意~

Fûhn 喺一幢食肆大廈入面,雖然唔係地舖,不過因為好近銅鑼站出口所以都好易搵!餐廳就唔算大嘅,但翻檯同出餐都幾快,閒日晚飯時間黎都唔使點等位,如果想喺銅鑼灣食個快飯呢度都係唔錯嘅選擇呢~


生牛肉牛丸湯粉 L($79)🌟🌟🌟🌟

呢度嘅 pho 係分咗 Regular、L、XL 同 XXL 四個 size,小編覺得正常食量嘅揀 Regular 都已經夠哂,至於 L size 嘅份量就啱兩個人開心 share。比較特別嘅係餐廳有八種香草可以提供,亦會另上一大碟芽菜、辣椒、青檸,份量夠哂大方,跟足北美越南餐廳個邊,但記得要先喺落單嘅時侯同 staff 講聲~檯上面亦都有是拉差同海鮮醬俾大家加落 pho 度同點牛肉食~

上檯之後第一時間緊係試下佢個靈魂之湯先啦!呢個湯頭唔單止望落清澈,實際飲落都幾清,嗱唔好誤會並唔係講緊冇味個種清,而係湯入面淡淡地嘅牛骨香、蔥香、香草香,三樣野夾埋令到個湯香得黎又唔會有牛油個種膩,亦唔會死鹹。

順帶一提,呢度嘅 pho 係預設咗俾金邊粉,如果想轉河粉係要預先提出的~金邊粉夠滑,都幾掛到湯,配料方面小編就覺得生牛肉幾有驚喜,牛味幾濃,可能因為用咗美國安格斯牛,

牛丸係手打嘅,不過不失啦,食落都幾彈牙,整體黎講個湯做得好已經幫呢碗 pho 加咗好多分~不過小編就略嫌湯底唔係幾夠熱,熱多少少肯定仲正。


柚子鮮蝦沙律 $75 🌟🌟🌟

呢個柚子沙律望落份量都唔細,而且蝦都算多,不過到真係食嘅時候就發現原來有半碟都係嗰塊生菜黎,以呢個價錢黎講就似乎蒫咁啲喇,不過個沙律都幾新鮮,酸酸地好開胃,柚子多汁唔會偏苦,蝦係新鮮蝦,兩個人好快就 ko 哂成碟野~


鮮蝦米紙卷(免費換)🌟🌟🌟

食越南野點都要叫返個米紙卷嘅,小編今次就用 Whoot! 免費換咗一碟,雖然唔使錢,但都跟返正常份量俾足 4 條,share都夠食!米紙卷望落好似好簡單咁,但實情要整得好食都係要啲技巧!小編之前食過某啲米紙卷唔單止米紙厚身,就連入面嘅配料都係偏硬!不過 Fûhn 呢個就整得唔錯,米紙嘅厚薄度,濕黏度都適中,而且蔬菜嘅份量比例同軟硬都啱啱好,重點一定要點佢個特製花生海鮮醬,呢個係越南嘅傳統蘸醬黎,主要係用花生醬同海鮮醬,再另外加其他調味料炮製而成,兩樣野一淡一濃味道好夾,清得黎又幾惹味~

IMG_E1703_1.jpg

🍴 整體評分 🍴

味道 🌟🌟🌟

環境 🌟🌟🌟

服務 🌟🌟🌟

價錢 🌟🌟🌟🌟


Fûhn

地址:銅鑼灣駱克道 459 - 461 號 The L. Square 1 樓

網址:https://app.whoot.com/#/shop?shopId=7

Whoot Limited