銅鑼灣.日本菜:樓上居酒屋中平價高質素 Lunch

Lunch 對一個打工仔黎講真係非常非常非常重要,食得好唔好完全會影響跟住落黎半日嘅心情,所以小編間唔中一定要對自己好啲!今次就同同事揀咗呢間樓上日本菜 - 塩玉居酒屋。呢度晚市係出名食 omakase 同串燒,不過 omakase 就唔係咁日常,通常都係特別日子先食,所以今次就試咗個 lunch 先~

塩玉每個 lunch set 都會包麵豉湯、前菜同甜品,價錢由平價去到中價都有(Like Facebook 仲會全單 8 折),最緊要係野食質素都幾好,可以翻兜!

跟餐前菜:冷胡麻豆腐 + 雜錦沙律 🌟🌟🌟

估唔到呢度嘅跟餐前菜都有兩款,冷豆腐嘅味道同質素正常,呢兩樣野放埋一齊基本上都唔會點出錯~沙律菜同車厘茄都幾新鮮同甜,沙律汁 ok 唔太酸或者太甜。另外嗌飯餐仲會跟多個麵豉湯,連埋餐後甜品即係總共有四樣野!抵啦!


松葉蟹蓋海膽石鍋飯($138)🌟🌟🌟🌟

一望落去已經覺得好足料,賣相超吸引~!松葉蟹蓋入面塞滿咗海膽、蟹肉、蟹膏同蟹籽,但呢度都未係全部,因為飯同蟹蓋中間仲有多一層蟹膏!所以絕對唔會出現飯太多而唔夠味嘅情況。單獨試咗個海膽先,食落都幾新鮮,帶少少天然海膽甜,唔會有任何令人覺得唔舒服嘅腥味。趁仲熱嗰陣快快手將所有材料撈勻,差唔多粒粒飯都沾到蟹膏,蟹膏同樣唔會腥,蟹味同鹹味適中,撈飯勁正!唯一麻麻地嘅地方就係石鍋唔夠熱,只係得暖暖地嘅程度。


北海道海膽刺身飯($128)🌟🌟🌟🌟

呢個刺身飯又係好足料抵食,想喺香港食個咁嘅刺身飯肯定坐底 $150 走唔甩。呢碗入面有北海道海膽、三文魚子、松葉蟹肉、三文魚、帆立貝五種刺身,樣樣都有返咁上下份量同厚度,所以真正食落其實係刺身仲多過飯。海膽係黎自北海道,creamy 得黎好香海膽味,三文魚子粒粒都卜卜脆,帆立貝啖啖肉,三文魚同蟹肉就中規中矩,但重點係每種刺身都非常新鮮!


燒雞扒湯烏冬 🌟🌟🌟🌟

同事叫嘅燒雞扒烏冬,烏冬係清湯底,入面有菜有菇,味道就唔算話好特別嘅,但至少個湯唔會太鹹或太淡,唔會食到好口渴先,烏冬口感就正正常常,食落份量都唔少。至於塊雞扒同事就幾鍾意,小編試完都覺得幾好食!塊雞扒係燒得啱啱好,雞皮食落好脆,有焦香,但又唔會燶到帶苦味,整體黎講都幾好!


他人豚肉丼 🌟🌟🌟

同事 order 嘅滑蛋豚肉飯,份量都幾大~飯上面冚滿咗雞蛋 + 豚肉 + 洋蔥,豚肉嘅數量唔會太少,撈埋個汁一齊食都幾好味,唔錯!


跟餐甜品:紅豆黑糖和菓子 + 蕨餅 🌟🌟🌟

set-desserts.jpg

呢兩款甜品都唔係好甜個種,幾啱啲唔係特別好甜野嘅朋友食。小編就鍾意紅豆黑糖和菓子多啲,黑糖香重過紅豆香少少,一咬落去口感勁煙煙韌韌,內層啲吉士就好軟滑,就算一啖食哂成個都唔會令人覺得好甜膩。黃豆粉蕨餅入口幾香,但相對黎講就冇黑糖紅豆咁甜。


🍴 整體評分 🍴

味道 🌟🌟🌟🌟

環境 🌟🌟🌟

服務 🌟🌟🌟🌟

價錢 🌟🌟🌟🌟


塩玉居酒屋

地址:銅鑼灣登龍街 28 號永光中心 10 樓

網址:https://app.whoot.com/#/shop?shopId=4

Whoot Limited