銅鑼灣.泰國菜:廿年老字號私房泰菜 多料地道船麵 + 黯然燒雞!

喺咁多種辣入面小編就鍾意酸辣,所以間唔中都會搵間泰菜整返個冬蔭公過下辣癮。以前泰國野未咁普遍,想食泰國人主理嘅正宗泰菜多數都要走入九龍城,一係就要聽朋友介紹捐窿捐罅咁搵,但而家仲邊駛咁麻煩吖,就連銅鑼灣呢啲購物區都食到地道泰菜!

sawadiclub.jpg

如果你都係泰菜 fans,應該都有聽過金蘭花呢個名,呢間餐廳由當年細細地嘅樓上私房泰菜做起,到最近係就喺怡和街開咗新分店,位置喺正 Sogo 斜對面,一顎高頭就望到,非常易搵!小編大概晏就 12 點零呢啲時間去食 lunch,直入唔使等位~lunch set 都算係多選擇,價錢 around $60-80 咁上下,除咗野飲之外餐仲會跟多個甜品,唔算好平不過呢個地段黎講合理啦!

值得一提嘅係,如果黎金蘭花慶生,係有得聽泰文版嘅生日歌㗎!仲可以叫一個特別設計嘅加大版芒果糯米飯!小編食飯個陣就撞正有人慶祝生日,餐廳播歌之餘仲拎埋支咪出黎俾壽星同朋友一齊唱~哈哈~


泰式船麵($72)🌟🌟🌟🌟

船麵係一種泰國好常見嘅平民粉麵,出咗名濃味同份量細。香港雖然最近都開多咗專食船麵嘅餐廳,但其實呢種粉麵係香港都未係好普遍,因為船麵湯底係要用到多種泰國香料特別熬製,咁樣食起黎先會香先會濃味,所以要整都好費時間同心機。

金蘭花呢個船麵對比起泰國算係溫和少少,但我諗對多數香港人包括小編黎講都係重口味嘅。個湯底好濃郁好稠,花生香味重,偏鹹但帶少少甜味,唔辣。麵有得揀金邊粉,河粉,粉絲,另外特別啲嘅仲有糙米粉,標榜營養價值高而且飽肚。小編今次就揀咗粉絲,完全索哂湯底嘅味道,而且食落都幾彈牙。至於配料就有牛丸、炸豬皮、牛肉、芽菜等等,小編就覺得炸豬皮幾好食,鬆脆又香口,牛肉同牛丸嘅味道就反而俾湯底搶哂,相對黎講就比較普通,不過每樣配料俾嘅份量都唔少,可以一試!


炒金邊粉($68)🌟🌟🌟

泰式嘅金邊粉可以話同香港乾炒牛河兄弟黎,大家都係平民野,都係望落簡單但實質好講技巧同火候嘅一樣食物~呢碟金邊粉望落去嘅色水偏橙,味道方面甜酸味會比較突出,似乎茄汁都落得幾多下,而且係完全唔辣嘅,偏向係香港人食開嘅味道,不過個粉炒得幾好,唔會一舊舊亦唔會好油,條條分明,配料亦好足夠,而值得一讚嘅係花生碎嘅份量俾得好大方,而且成堆放係角落,咁就可以自己控制要幾多!


黃咖喱雞飯($72)🌟🌟🌟

泰式咖喱有好多款,最常見嘅就係紅黃綠(青)三種,青咖喱最辣,紅咖喱次之,黃咖喱就最溫和。呢個咖喱微辣帶少少甜味,椰香都幾出,非常易入口,薯仔同雞肉都煮得好淋,入哂味!


黯然銷雞飯($62)🌟🌟🌟🌟

「實在係太黯然,太銷魂喇~~~」既然叫得做黯然銷雞飯,唔知係咪會好食到好似家燕姐咁大叫同流眼淚呢哈哈~燒雞其實係除海南雞以外另一樣泰國好出名嘅雞料理,特色係香脆,味濃同多汁。金蘭花嘅燒雞飯就完全符合到呢三點,每一舊雞都沾滿咗濃濃嘅醬汁,雖然係偏鹹但送飯認真一流!而且雞肉係仲保持到嫰滑多汁,雞皮就帶少少燒完之後嘅香味,好食!夾埋半生熟流心嘅荷包蛋,正,如果有埋脆邊就更香口!


🍴 整體評分 🍴

味道 🌟🌟🌟

環境 🌟🌟🌟

服務 🌟🌟🌟

價錢 🌟🌟🌟


金蘭花泰國餐廳

地址:銅鑼灣怡和街22號3樓

網址:https://app.whoot.com/#/shop?shopId=9

Whoot Limited