食得唔食得?六大農曆新年飲食宜忌!

農曆新年一向都有好多習俗要注意,對於我地呢啲唔識死嘅後生仔黎講真係好易一個唔覺意就踩中地雷~除咗貼揮春包利是,執屋大掃除,買定紅底橫,用碌柚葉沖涼呢啲聽到識背嘅習俗之外,今次就等小編同大家講講好容易俾人忽略嘅一項 —— 就喺「食」呢方面嘅宜忌!

地雷位:初一忌食粥

未到新年已經係咁食食食食到滯哂,間唔中食下粥清下腸胃都好吖!但以傳統新年習俗黎講,年初一係切忌食粥!因為舊時社會就只係得窮等人家同病人先會食粥,而有錢人就會大魚大肉食富貴餐,所以粥係代表住貧窮,患病,冇啖好食!新年嘅第一餐食粥即係喻意黎緊一年都會窮住過兼冇啖好食。大家唔想唔好意頭就最好等一等,過咗初一先好食粥喇!

地雷位:初一第一餐忌食肉

chinese-new-year_reunion-table_1.jpg

上面先講完大魚大肉代表住有錢同富貴,咁點解初一又忌食肉呢?咁係因為新年始終都係喜慶嘅日子,尢其係一年之始嘅大年初一,傳統黎講呢日係忌見血同忌殺生,殺生係被認為會帶黎唔好嘅意頭,以及刀災、血災等等嘅災禍,所以好多人都會選擇喺新年嘅第一餐食齋菜,唔使殺生之餘又可以食清少少。

地雷位:忌食魚頭魚尾 + 雞頭雞尾

chinese-new-year_fish.jpg

香港人每逢做節都必定會有石斑魚同炸子雞食,但如果係食團年飯或者開年飯,就要留心唔好一個唔覺意就食哂成條魚同成隻雞!因為食剩魚頭魚尾,雞頭雞尾象徵住「年年有餘」同「好頭好尾」!

好意頭:初一宜食齋

除咗因為新正頭忌殺生同見血之外,初一食齋呢個習俗其實都同佛家每月初一、十五齋戒有關,黎到農曆新年即係帶有敬佛、積福、素靜同平安嘅意思。喺香港食開嘅齋菜多數都係羅漢齋同南乳粗齋呢兩種,入面普遍都會有冬菇、木耳、豆卜、荷蘭豆、金針菜、髮菜、紹菜、粉絲等嘅基本材料,覺得唔夠喉仲可以搭多份脆卜卜嘅素鵝!咁就算初一食齋都夠哂豐富啦!

好意頭:年三十食湯圓

煙煙韌韌嘅湯圓絕對係中式糖水嘅王者!湯圓喺華人文化入面象徵住團圓,喺團年飯後整返碗甜湯圓,即係喻意甜甜蜜蜜咁團圓!但要注意,湯圓必須要係甜嘅,數目亦都要係雙數,而且 size 要夠大夠飽滿,咁先會雙雙對對,團圓美滿!

好意頭:提早入定米同油

辦年貨除咗要大手入定糖、瓜子、油器之外,千祈唔好漏咗米同油!喺新年前填滿米值缸,儲起糧油喻意豐衣足食,衣食無憂!有好多老人家仲會喺米缸外面癡張寫住「滿」字嘅紅紙,代表糧食常滿。

賀年食物有咩寓意?

髮菜 — 發財

蠔豉 — 好市

生菜 — 生財

豬脷 — 大吉大利

蓮子 — 連生貴子

糕類 — 步步高升

糖類 — 甜甜蜜蜜

瓜子 — 抓銀

笑口棗 — 笑口常開

豬手 — 橫財就手

煎堆 — 煎堆碌碌,金銀滿屋

Whoot Limited