愈夜愈 Chill!諾士佛臺寢宮主題特色酒吧 飲住茶杯 Cocktail 歎精緻西餐

作為香港人飲野勝地嘅諾士佛臺的確有唔少酒吧,不過有好多其實都係冇乜特色嘅劈場嚟,有時走上樓捐窿捐罅尋下寶,反而會搵到唔少驚喜!喺諾士佛臺商廈入面嘅寢宮 Badroom,就既係一間樓上主題酒吧,亦係一間出品精緻嘅西餐廳,靚酒配美食,無論酒鬼同食家都千萬唔能夠錯過!


處處都係打卡位:Tiffany Blue 雲石座位 + 室內韆鞦 + 手繪牆畫

既然叫得做寢宮,Badroom 嘅裝潢佈置當然係華麗十足,座位以 Tiffany Blue 同淺灰色雲石做主色調.加埋私隱度高嘅圓弧形梳化,高貴得黎又充滿時尚感,俾人一種可以放心摸住酒杯傾心事嘅感覺。

酒吧入面亦都有韆鞦仔,女生們一邊輕搖慢盪,一邊飲住酒傾密計,都幾有 feel 呢。


4 種娛樂玩意:飲野消遣一條龍直落

Badroom 雖然喺裝潢風格上走女仔路線,但講到玩方面,絕對唔會漏咗男士們!酒吧一邊就設有大型桌球檯同鏢機,飲到悶悶地可以隨時玩番幾鋪過下手癮。

以為得咁少?場內仲有兩張 Beer Pong 檯同卡啦 OK 房,設施夠多就算多人嚟都唔需要爭玩。


茶杯裏的 cocktail:4 大美人特色調酒  

一間酒吧夠唔夠格,只要睇下佢地嘅招牌 cocktail 就一清二楚。Badroom 係 cocktail 上同樣貼合番寢宮呢個主題,以中國 4 大美人創出中西合壁 cocktail,而杯杯嘅用料同味道都係有根有據,心思滿分。

西施

以冧酒配桃橙果汁調成,飲落橙味突出,酸酸甜甜,感覺清新。

王昭君

以氈酒同紅莓汁為主,甜香味重而酒味較輕。

貂蟬

有別於其他幾杯以果香為主調,貂蟬以 Drambuie、Vodka、咖啡酒製成,入口順滑,整體味道雖然偏甜但咖啡味同酒味都相對突出。

楊貴妃

相傳楊貴妃係好鍾意食荔枝,呢款cocktail 就以荔枝酒為主調,再加入新鮮西柚同 tequila 調製,淡淡嘅荔枝香同酒味非常夾。

Melon Margarita

還原基本步飲番啲傳統 cocktail,一樣有水準。Melon Margarita 以新鮮蜜瓜混合 Midori 同 Tequlia 製成,舉起酒杯時先會聞到一陣香茅味,入口後反而就俾蜜瓜味搶哂鏡,酒味廿唔會太重,感覺清爽得黎帶熱帶風情。


高水準西餐菜式:十幾款精緻主菜可選

香煎盲鰽魚柳保雲蘇

酒吧之外,Badroom 晚餐時段亦會供應十幾款西式套餐,肉眼牛扒、黑毛豬鞍、香煎魚柳、燒羊鞍、慢煮鴨脾、意粉等等,基本上各個種類都有齊,套餐更包湯同沙律一份,相當豐富。

魚柳外皮煎得非常香脆,魚肉口感結實又爽口,番茄醬濃郁但唔會搶過魚肉嘅味道,酸酸地反而開胃。

法式藍帶雞胸配什菌意粉

一道經典但喺香港唔太常見嘅歐洲菜式,雞胸入面通常會釀入芝士同火腿,不過 Badroom 就反傳統咁釀入什菌,令到口感更有層次,先係雞胸外層炸得香口,再嚟就係仍然 keep 到嫰滑嘅雞肉同香濃嘅菇菌,味道十分豐富。

正餐之外 Badroom 亦都有多款送酒小食,啱哂大家飲住酒 chill and chat。


寢宮

地址:尖沙咀諾士佛臺10號5樓A-C室

網址:https://app.whoot.com/#/shop?shopId=25

Whoot Limited