2019 父親節陪老竇啤啤佢!4 間高質素居酒屋推介

What day is it? 父親節!What do we do?好好多謝兼慰勞老竇!慶祝父親節唔需要太花巧,一餐啱口味嘅飯再加幾杯啤酒,相信已經令平時唔多在意節日慶祝嘅老竇相當驚喜!編輯今次為大家推薦 4 間有靚酒飲嘅高質素居酒屋,父親節一於約埋老竇啤啤佢,一切盡在不言中!


Rerere 1001 日式串燒

Rerere1001 日式串燒由日籍廚師主理,居酒屋嘅格局,主打各款日式串燒、煮物、炸物,而酒類更加係相當齊全,包括以日本水釀製嘅啤酒、清酒、梅酒以及威士忌等等,一定總有一款啱老竇口味!其中送酒小食同串燒更係做得非常出色,例如可半生熟食用嘅刺身級雞肉串燒,配上特製醬汁,嫰滑又惹味;以鰹魚內臟配搭忌廉芝士嘅酒盜芝士,口感綿密,芝士味濃郁,一啖美食一啖酒,俾老竇最好嘅父親節享受。

地址:銅鑼灣渣甸街 66 號亨環 22 樓

網址:https://app.whoot.com/#/shop?shopId=40


風流居酒屋

如果想俾個驚喜老竇,一餐色香味與娛樂俱全嘅廚師發辦絕對係最佳選擇。風流居酒屋嘅廚師發辦做得非常貼心,唔單止可以按喜好選擇生或熟嘅菜式,更加可根據客人嘅 budget 設計菜單,由主廚挑選當日最優質嘅食材烹調而成,所用嘅魚生每日由日本直送到港,保證食得落肚都係新鮮!望住師傅用心烹調菜式,更加係父親節最佳節目之一。

地址:大圍大圍村第 3 街 32 號地舖 / 銅鑼灣登龍街 28 號永光中心 6 樓 A 室

網址:https://app.whoot.com/#/shop?shopId=28


心之食堂

如果你嘅老竇係行開輕鬆搞笑路線,可以諗諗呢間位於銅鑼灣嘅創意日式居酒屋,心之食堂。同樣都係主打日式料理,心之食堂嘅款式就非常有創意,其中一道評價極高嘅「邪惡包」菜式,以柔軟新鮮嘅帶子夾住充滿油香嘅鵝肝,未食已經感受到層次口感有幾豐富,味道有幾邪惡!連同多款有新意嘅創作料理如李小龍卷、刺身串串串、心之火焰鐵板牛柳串,咁有新意一定啱哂怕悶嘅老竇!

地址:銅鑼灣耀華街 3 號百樂中心 12 樓 1203 室

網址:https://app.whoot.com/#/shop?shopId=65


牛石料理

如果各位嘅老竇係無肉不歡,咁呢間主打燒肉同新鮮海鮮嘅牛石料理就絕對係你父親節嘅首選!有別於一般燒肉餐廳,牛石料理每枱都設有麥飯石板烤爐,以火山石燒烤嘅牛肉,入口香而不膩,更可選擇嚟自日本或澳洲嘅和牛,肉質油脂更加上乘豐腴。燒烤以外,牛石料理仲有多款由產地直送嘅海鮮同刺身,例如日本嘅活海膽,毛蟹、生蠔等等,配埋清酒品嚐,質素之高一定能令高要求嘅老竇滿意!

地址:九龍城福佬村道 51 號地下

網址:https://app.whoot.com/#/shop?shopId=57

Whoot Limited